«Аралтұздың» құрамында шыны бар» деп Ресей таратқан ақпарат қаншалықты рас?
Kyzylorda-news.kz. «Аралтұз» компаниясы өндіретін «Славяночка» тұзының құрамында шыны бар деген ақпарат жалған. Бұл жайында аталған компанияның ресми сайтында жария етілді.
Компания мәліметінше, соңғы уақытта интернет желісінде «Аралтұз» өндіретін өнімдерге қатысты негізсіз шабуылдар көбейіп кетті. Бұған қатысты ақпараттардың барлығы жалған. Одан кейін ақпараттық майдан ресейлік интернет-кеңістікте өршіп, «Аралтұз» өндіретін «Славяночка» тұзының құрамына шыны бар деген аудио және видео жан-жақты тараған.
«Аралтұз» АҚ соңғы уақытта әлеуметтік желіде тараған ақпараттың шындыққа жанаспайтындығын ресми мәлімдейді. «Славяночка» тұзының құрамында адам ағзасына мүлдем зияны жоқ эпсомит пен астраханит сынды табиғи минералдардан тұратын ерімейтін тұнба бар. Қайта өңдеуге келетін шикізат экологиялық тұрғыда таза. «Аралтұз» АҚ-ның барлық өнімдері ЕАЭО аумағындағы тәуелсіз аккредиттелген зертханаларда тексеріліп, сәйкестік декларациясын алады. Біз «Аралтұз» АҚ-ның ас тұзы экологиялық таза әрі әлемдік стандарттарға сай екендігін нық сеніммен айта аламыз», - деп атап өтеді компаниядан.
Осы орайда, Нұр-Сұлтан қалалық тауарлар мен қызметтердің сапасы мен қауіпсіздігін бақылау департаментінің басшысы Сәдақас Байғабылов Ресейдегі Қазақстан тұзына қатысты жарияланымдарға пікір білдірді. Сонымен қатар, ол «Аралтұз» өнімдеріне зертханалық зерттеулер жүргізілетіндігін ескертті.
