Қызылордадағы халыққа қызмет көрсету орталықтарында сақтық шаралары күшейтілуде (ФОТО)
Kyzylorda-news.kz. Әлем жұртын алаңдатқан коронавирус пандемиясының алдын алу шараларына қатысты Қызылорда облысындағы Халыққа қызмет көрсету орталықтарында сақтық шаралары күшейтілуде.«Коронавирус инфекциясына байланысты Қызылорда қаласындағы барлық Халыққа қызмет көрсету орталықтарында аталған індеттің алдын алу шаралары басталды. Халыққа қызмет көрсету бойынша №1, №2, №3, №4 бөлімдері мен көші-қон орталығы және мамандандырылған бөлімдерінде залалсыздандыру жұмыстары жүргізілді. Барлық бөлімдерде медициналық тазартқыш құралдары мен сұйық су сабындар белгіленген жерлерге қойылды. Сонымен қатар, күніне 3 рет хлор препаратымен ғимараттар тазалануда», деп хабарлады біздің ақпарат агенттігіне «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалының баспасөз қызметінен.
Айта кетейік, елімізде Төтенше жағдай жариялануына байланысты барлық ойын-сауын орталықтарының жұмысы тоқтатылып, той-томалақ пен ас өткізуге тыйым салынған болатын.
