ШАЛҒАЙ АУЫЛДАР МОБИЛЬДІ БАЙЛАНЫС ЖӘНЕ ИНТЕРНЕТ ЖЕЛІСІМЕН ҚАМТЫЛАДЫ
Қазіргі таңда Жалағаш ауданына қарасты Аққыр, Жаңадария, Жаңаталап, Далдабай, Мырзабай ахун, Жаңақоныс елді мекендері сымсыз EVDO байланысы арқылы интернет желісіне қосылған. Дегенмен, байланыстың бұл түрі пайдаланушылардың интернетке деген сұранысын толық қанағаттандырмайды. Осыған байланысты биыл аталған ауданда 4G мобильді байланысын тарату қолға алынбақ. Бұл туралы өңірлік коммуникациялар қызметінде өткен баспасөз конференциясында Жалағаш ауданының әкімі Қайратбек Сәрсенбаев мәлімдеді.
Елбасының биылғы Жолдауының өзегі – технологияландыру және цифрландыру. Қазақстан халқын сапалы, үздіксіз және 4G мобильді байланысымен қамту. Осыған орай, Жалағаш ауданында «Цифрлық Қазақстан» бағдарламасын жүзеге асыруға негізделген жұмысты басталды.
ҚР Қорғаныс және аэроғарыш өнеркәсібі министрлігі «КаzSat» ғарыштық байланыс жүйесін ауылдық елді мекендерді кең жолақты қолжетімділікпен қамтамасыз етуді 2021 жылға дейін кезең-кезеңімен пайдалану мүмкіндігін қарастыруда. Соның ішінде, ауданындағы Мырзабай ахун, Аққұм, Аламесек, Жаңадария, Жаңаталап, Мақпалкөл ауылдарын интернетке «Цифрлы Қазақстан» Мемлекеттік бағдарламасының бірінші кезеңінің шеңберінде жердегі талшықты-оптикалық байланыс желілері арқылы қосу, екінші кезеңінің шеңберінде LTE-800 мобилді байланыс желілері арқылы Аққыр ауылы мен Далдабай, Жаңақоныс елді мекендерін интернетке қосу жоспарлануда, - деді Қайратбек Әубәкірұлы.
Сонымен бірге, Жалағаш кенті, Ақсу, Бұқарбай батыр, Мәдениет, Таң, Шәменов, Қаракеткен, Еңбек ауылдарын «Цифрлы Қазақстан» Мемлекеттік бағдарламасының үшінші кезеңінің шеңберінде «KazSat» сериялы байланыс спутниктері арқылы қамтамасыз ету ұсынылуда.
Жалпы, халықтың компьютерлік сауаттылығын арттыру үшін Жалағаш ауданы 1761 адамды білім ұйымдарының базасында оқыту көзделіп отыр. Ал, білім беру саласындағы цифрландыру бойынша бүгінде интернетке аудандағы 20 мектеп қосылған. Кең жолақты интернет нүктесіне 16 мектепте 26 интернет нүктесі орнатылған. Нақты кезеңде ауданның 11 мектебі «Электронды күнделік» жүйесіне қосылып жұмыс жүргізуде.
