Алдағы күндері қар жауады
Kyzylorda-news.kz. 3-5 қарашаға арналған ауа райы болжамы жарияланды, деп хабарлайды Қазгидромет.
Қазақстанның батысында және солтүстігінде антициклон әсерінен жауын-шашын күтілмейді. Республиканың қалған аумағында фронтальды учаскелердің өтуімен ауа райының тұрақсыз сипаты сақталады. Солтүстікте, шығыста және орталық, шығыс облыста қалың қар жауады. Республиканың басым бөлігінде тұман түсіп, жел күшейеді. Солтүстікте, шығыста және орталықта көктайғақ болып, бұрқасын күтіледі.
Шығыс Қазақстанның солтүстік жартысында, Қарағанды облыстарының солтүстігінде, шығысында тұман түсіп, көктайғақ болады.
Ақмола облысының солтүстігінде, батысында, шығысында тұман, көктайғақ, түнде облыстың шығысында бұрқасын күтіледі.
Күндіз Алматы облысында, Түркістан облысыда Қызылорда облысының басым бөлігінде, Атырау, Ақтөбе облысында желдің жылдамдығы 15-20 м/с-ке жетеді. Қызылорда, Түркістан облыстарында жел екпіні 23 м/с-ке дейін күшейеді.
Жамбыл облысының солтүстігінде және таулы аймақтарында тұман күтіледі, күндіз солтүстік-шығыста және таулы аймақтарда желдің жылдамдығы 15-20 м/с-ке дейін күшейеді.
Қостанай облысының солтүстігінде түнде және таңертең тұман күтіледі, оңтүстікте желдің жылдамдығы 15-20 м/с-ке дейін күшейеді.
Күндіз Маңғыстау облысының солтүстік-шығысында желдің күші 15-20 м/с-ке жетеді, шаңды дауыл күтіледі. Батыс Қазақстан облысының солтүстігінде түнде және таңертең тұман күтіледі.
