Сыр Медиа

Аймақтағы оқу орындарының студенттері мен мектеп оқушылары арасында жыл басынан бері «Мен саған есірткі жайлы айтып беремін...» тақырыбында эссе жазудан, «Берік отбасы – есірткіден алыс!» ұранымен отбасылар арасында эссе жазып бұқаралық ақпарат құралдарында жариялау сайысы, черлидинг спорт – сауықтыру би сайысы, «Мен өмірді қалаймын!» тақырыбында өткізілген отандық, патриоттық әндерді орындау байқауы, есірткіге қарсы үгіт бригадалар сайыстары ұйымдастырылған болатын.

  Қызылорда облысы ішкі істер департаменті Есірткі бизнесіне қарсы күрес басқармасының ұйымдастыруымен өткізіліп жатқан конкурстар бүгін қорытындыланды.

  Облыстық ІІД баспасөз қызметінің хабарлауынша аталған сайыстардың жеңімпаздары мен жүлдегерлері «Біздің денсаулығымыз – өз қолымызда!» атты акцияда марапатталды. Сайыс қорытындысы бойынша жеңімпаз атанған 173 қатысушыға бағалы сыйлықтар, 233 қатысушыға Қызылорда облысының ішкі істер департаментінің дипломдары және алғыс хаттары табысталды.

  Айта кетейік, акцияның мақсаты жастар мен жасөспірімдер арасында нашақорлықтың алдын алу, салауатты өмір салтын насихаттау және жасөспірімдердің бос уақытын тиімді пайдалануға баулу болып табылады.