Сейсенбіде еліміздің бірқатар өңірінде қатты аяз болады
«Қазгидромет» РМК 25 желтоқсанға арналған ауа райы болжамын ұсынады, деп хабарлайды ҚазАқпарат.
Қазақстанның батысында, оңтүстік-батысында және де оңтүстік территориясында жауын-шашын жауады, қалған бөліктерінде жауын-шашынсыз ауа райы күтіледі.
Республиканың кей жерлерінде тұман, көктайғақ, бұрқасын, желдің күшейюі күтіледі. Қызылорда облысының кей жерлерінде тұман түседі, жолда көктайғақ, күндіз кей жерлерінде жел 15-20 м/с күшейеді.
Батыс Қазақстан облысының кей жерлерінде тұман түсіп, көктайғақ, бұрқасын болады, желдің жылдамдығы 15-20 м/с жетеді деп болжанады.
Алматы, Жамбыл, Атырау, Қостанай, Түркістан, Шығыс Қазақстан облыстарының кей жерлерінде тұман болады.
Жамбыл, Атырау, Түркістан, Маңғыстау облыстарының кей жерлерінде көктайғақ, жаяу бұрқасын болады.
Ақтөбе облысының кей жерлерінде жел 18 м/с күшейеді. Түнде Солтүстік Қазақстан, Павлодар, Алматы, Ақмола, Қарағанды облыстарының кей жерлерінде қатты аяз күтіледі.
