Қала аумағының көлемі 20 мың гектарға ұлғайды
Қала аумағының көлемі бұған дейін 11 мың гектар болатын, жаңа жоспармен 20 мың 582 гектарға ұлғайды. Бұл туралы Өңірлік комммуникациялар қызметінде өткен баспасөз конференциясында Қызылорда қаласының әкімі Нұрлыбек Нәлібаев мәлімдеді, деп хабарлайды Kyzylorda-news.kz.
Қала әкімінің айтуынша, өткен жылдың тамыз айында Қызылорда қаласының Бас жоспарына түзетулер енгізу жобасы Үкімет бекітуіне жолданды. Бас жоспарға сәйкес 2025 жылға дейін қаланың даму бағыттары көрсетіліп, барлық инженерлік инфрақұрылымдардың сызбаларына өзгерістер енгізілді.
"Сондай-ақ, қала халқының қарқынды өсуіне байланысты Сырдария өзенінің сол жағалауы игеріліп жатқаны белгілі. Осыған орай, 1 мың 532 гектар аумақтың жоспарлау жобасы әзірленді. Қала шекарасының өзгеруі халықтың жаңа қоныстану аймақтарын қалыптастыруға ықпал етеді. Жеке тұрғын үй құрылысы жаңадан ашылған «Бәйтерек» тұрғын ауданына қарай дамып, көп қабатты тұрғын үй құрылыстары Сырдария өзенінің сол жағалауында салынады", - деді Н.Нәлібаев.
Қаланың бас жоспарына енгізілген өзгерістерге байланысты «Арай», «Сабалақ», «Эдельвейс» саяжайлары қала аумағына енгізілді. Қазіргі кезде осы аумақтарға тиісті қаржы бөлініп, кезең-кезеңімен инженерлік инфрақұрылымын дамыту жұмыстары жүргізілуде.
Айта кету керек, сол жағалаудағы жаңа құрылыс алаңдарында компаниялардың өз қаражаты есебінен 5 қабатты 18 тұрғын үй, 320 орындық балабақша салынды. Облыстық бюджет есебінен қалалық музей "Рухани жаңғыру" орталығы бой көтеріп, ел игілігіне қызмет етуде.
«Болашақ» университетінің студенттер қалашығы, "Жастар орталығы" ғимаратының құрылысы қарқынды жүргізілуде. Осы аумақта 100 келушіге арналған емханамен қоса 300 төсектік көпсалалы облыстық аурухана, 900 орындық мектеп, мемлекеттік - жекеменшік әріптестік аясында 500 келушіге арналған емхананың құрылысын салу жоспарлануда.
