Медицина саласының ардагері Тұрғанбай Маханов 80 жасқа толды
Денсаулық сақтау саласының ардагері, Қызылорда облысының және Жалағаш ауданының құрметті азаматы, ҚР Еңбек сіңірген қайраткері Тұрғанбай Маханов 80 жасқа толды, деп хабарлайды Kyzylorda-news.kz облыс әкімінің баспасөз қызметіне сілтеме жасап.
Қызылорда облысының әкімі Қырымбек Көшербаев ардагерді мерейтойымен құттықтап, аймақ медицинасын дамытудағы ерекше үлесін атап өтті.
«Облыстың денсаулық сақтау саласы дегенде, біздің мақтанар дүниеміз көп. Өйткені, қазақтан шыққан тұңғыш дәрігер Әли Көтібаровтан бастап, балалар хирургиясының атасы, дүниежүзілік деңгейдегі үлкен ғалым, академик, Қазақстан Республикасы Мемлекеттiк сыйлығының лауреаты, профессор Камал Ормантаев Сәруарұлы, Қазақстанның Еңбек Ері, 5 мыңнан астам жүрекке ашық ота жасаған Юрий Пя, Қазақстанның «100 жаңа есіміне» кірген, медицина ғылымдарының докторы, профессор Болатбек Баймаханов және басқа да жерлес дәрігер профессорларымызды мақтана айтамыз. Сыр өңірі медицинасы тарихында Тұрғанбай Маханұлының есімі ерекше аталады. Аймақтың денсаулық сақтау саласына сіңірген еңбегі ұшан-теңіз, Сыр медицинасының көптеген жас дәрігерлеріне үлгі болды. Тұрғанбай Маханұлы 1994 жылдың тамызынан 1996 жыл аралығында облыстық денсаулық сақтау басқармасының бастығы лауазымын қоса атқарды. Қазіргі таңда облыстық медицина орталығының «Құрметті директоры», осы ұйым басшысының кеңесшісі, Қазақстан дәрігерлері мен провизорлары ассоциациясының Қызылорда облыстық филиалының Президенті», - деді аймақ басшысы.
Облыс әкімі мерейтой иесіне саяси-әлеуметтік, экономикалық және денсаулық сақтау саласының дамуына сіңірген еңбегі үшін Қазақстан Республикасы Премьер-Министрінің «Алғыс хатын» және Қазақстан Республикасы Парламенті Сенатының Төрайымы Дариға Нұрсұлтанқызының құттықтауын, сондай-ақ, «Ұлттық Медицина ассоциациясы» қоғамдық бірлестігінің ең жоғарғы наградасы «AVE-VITAE» орденін табыстады.
Сонымен қатар, Қазақстан Ұлттық Ғылым Академиясының академигі, ҚР Мемлекеттік сыйлығының иегері Төрегелді Шарманұлы мен ҚР Парламенті Сенатының депутаты Мұрат Бақтиярұлы, Қазақстан Республикасының Еңбек сіңірген қайраткері Қорғанбек Қайруллаев және замандастары мен әріптестері ардагерді құттықтады.
Жиналған көпшілікке мерейтой иесі көрсетілген құрметтері үшін риясыз алғысын жеткізді.
