ҚҰРТ – КАЛЬЦИЙДІҢ КӨЗІ
Адам ағзасына зияны жоқ табиғи өнімдердің бірі – құрт. Ұлттық тағамның бұл түрін үлкен де, кіші де сүйсініп жейтіні белгілі. Қазақтың ұлттық брендіне айналған құрт – кальцийдің көзі. Тіпті дәрігерлердің өзі кальций дәрумені жетіспейтіндерге және жүкті әйелдерге құртты пайдалануды ұсынады. Сондай-ақ құрт ақуызға өте бай. Сондықтан ол құнарлы, тоқ тағам болып есептеледі. Оның құрамында А, В, С дәрумендері, мыс, мырыш, күміс, темір, кремний, магний, кальций, алюминий микроэлементтері жетерлік. Құрт көздің көру процесін жақсартады, жүректің айнуын басады, асқорыту бездерінің жұмыс істеу қабілетін жақсартады. Құртты диеталық тағам ретінде де қолдануға болады. Қой, ешкі, сиыр, тіпті түйе сүтінен құрт жасайды. Жас құрт, көбік құрт, сықпа құрт немесе сүзбе құрт, малта құрт, езген құрт деген сияқты құрттың бірнеше түрі болады.
