ШИЕЛІДЕН БАЛМҰЗДАҚ ШЫҒАДЫ
Бұл туралы Өңірлік коммуникациялар қызметінде өткен брифингте аудан әкімі Әшім Оразбекұлы хабарлады.
Өткен жылы ауданда жеке кәсіпкер Сабыр Ермаханов тәулігіне 400 литр түйе сүтін өңдейтін «Ару АНА» шұбат цехын іске қосқан. Өнімдері сұранысқа ие болған кәсіпкер биыл 61 млн. теңге несие алып, цехтың құрал-жабдықтарын қайта құрылымдап, тәулігіне 1 тонна шұбат және сиыр сүтінен әзірленген қаймақ, йогурт, сүт, айран, сүзбе, құрт өнімдерін нарыққа шығаруда.
- Біздің өнімдеріміз негізінен Ақтөбе, Алматы облыстарына жөнелтіледі. Келер жылы балмұздақ шығаруды көздеп отырмыз. Оған керекті жабдыққа Ресейге тапсырыс бердік. Жаңа өнімді Қазақстанның барлық өңірлеріне жіберуді көздеп отырмыз, - дейді цех технологы Баян Дүйсенбекова.
Айта кетейік, өнім сапасымен танылған «АруАна» шұбат цехы биыл облыс орталығында өткен «Қазақстанның үздік тауары» байқауында «Ең үздік халық тұтынатын тағам өндірісі» номинациясы бойынша 3-ші орынға ие болды.
