Сыр Медиа

Ауыр атлетикадан Қазақстан құрамасының спортшысы, Рио Олимпиадасының қола жүлдегері, Сыр өңірінің тумасы Александр Зайчиков «Қазақстандағы 100 жаңа есім» ұлттық жобасының екінші кезеңіне өтті.

Ол 2014 жылы Қорқыт Ата атындағы Қызылорда мемлекеттік университетін «Дене шынықтыру және спорт» мамандығы бойынша бітіріп, 2002-2006 жылдары Қызылорда облыстық жасөспірімдер олимпиадалық резерв мектебінде, 2006-2010 жылдары Жалаңтөс Бахадүр атындағы дарынды балаларға арналған облыстық спорттық мектеп-интернатында оқып, облыстық жоғары спорт мектебінде шеберлігін арттырған.

Александр Зайчиков ауыр атлетикадан халықаралық деңгейдегі ҚР спорт шебері. Оңтүстік Кореядағы жасөспірімдер арасындағы Азия чемпионатының қола жүлдегері, 2010 жылы Ташкент қаласында өткен жасөспірімдер арасындағы Азия чемпионатында да өнер көрсетіп жетістікке жеткен. Бір жылдан соң Малайзия мемлекетінің Пенанг қаласында өткен жастар арасындағы әлем чемпионатында қола жүлдені қанжығасына байлаған. Ол «Лондон 2012» жазғы Олимпиада ойындарына қатысушы. АҚШ-тің Хьюстон қаласында 2015 жылы өткізілген ересектер арасындағы әлем чемпионатына қатысып, жүлделі оралған. Сонымен қатар Рио Олимпиадасында қола жүлдеге ие болған.

Қызылордалық ауыр атлетшінің мұндай жетістіктерге жетуі оңайға соқпады. Ол бұл жеңістерге бір демде жете қойған жоқ, ол үшін көп тер төкті.

Оның Рио-де-Жанейродағы өнеріне Қазақстан халқы қатты алаңдады десек, артық айтқандық емес. Әсіресе, оның ішінде қызылордалықтардың Саша үшін қобалжып, оның жеңіс тұғырынан көрінуіне қолдау білдірді.

Александрдың Рио Олимпиадасындағы жеңісі атасы Виктор Зайчиковтың туған күнінде алғандықтан, оның бұл жеңісі атасы үшін теңдесі жоқ сый болған еді.

Ол ауыр атлетикаға келгенге дейін облыс орталығындағы біраз спорт түрлерінде өзін сынап көрді. Велоспорт, грек-рим күресі, дзюдо, еркін күрес, таэквондо секцияларына қатысып, соңында ауыр атлетиканың шыңын бағындыруды мақсат тұтқан.

Александр Зайчиков «Метрмет» орденінің иегері, Қызылорда облысы әкімінің Алғыс хатымен марапатталған.