ЖЫЛ СОҢЫНА ДЕЙІН БАЛАЛАРДЫ БАЛАБАҚШАЛАРҒА ҚАБЫЛДАУ КЕЗЕГІ АВТОМАТТАНДЫРЫЛАДЫ
ҚР Үкіметінің отырысынан кейін өткен баспасөз конференциясында білім және ғылым вице-министрі Асхат Аймағамбетов балабақшаға қабылдау кезегін автоматтандыру бойынша атқарылып жатқан жұмыстар туралы айтып берді. Бұл туралы ҚР БҒМ ресми сайтында жарияланған. Асхат Аймағамбетов балабақшаларға кезекке тұруды электронды түрде жүргізуге көшу балалардың мектепке дейінгі мекемелерге бару жолындағы кедергілерден арылуға және сыбайлас жемқорлыққа жол бермеуге жол ашатынын атап өтті.
«Пилоттық жоба 2017 жылы Оңтүстік Қазақстан облысында жүргізілді. Аталған пилоттық жоба өте жақсы нәтижелер көрсетті», — деді вице-министр.
Осы жылдың жазында республиканың 30 қаласында ОҚО тәжірибесін кеңінен қолдану көзделген.
2018 жылдың соңына дейін бұл жүйеге Интернеті бар барлық аймақтар мен елді мекендер қосылады.
ҚР БҒМ-де Мемлекет басшысының «Бес әлеуметтік бастамасында» айтылған, 20 мың қосымша грант бөлу міндетін орындау бойынша кешенді жұмыстар жүргізіліп жатыр.
«Қазіргі таңда ҚР БҒМ-де тиісті жұмыстар жүргізілді, ҚР Үкіметінің қаулы жобасы дайындалды, бүгінде ол қаралып жатыр», — деді вице-министр Асхат Аймағамбетов.
Қосымша гранттардың 11 мыңы техникалық бағыттағы мамандарды даярлауға, оның ішінде «Ақпараттық жүйелер» саласындағы мамандарды оқытуға бөлінеді. Сондай-ақ, жатақханалар салу мәселесі шешілетін болады.
«Мемлекет басшысының тапсырмаларын орындау ерекше бақылауға алынған», — деп түйіндеді Асхат Аймағамбетов.
