Жаңақорғанда арыстық балалар алаңсыз демалуда
Kyzylorda-news.kz. Жаңақорған ауданындағы «Талдысу» тынығу лагерінде барлығы 320 балаға арналған 4 корпус бар. Әрқайсысына 80 баладан жайғасқан. Балалардың тәрбиесін бақылау мақсатында 1 аға тәлімгер, 8 тәрбиеші бар.
Сондай-ақ, музыкаға бағыттайтын сүйемелдеуші, дене тәрбиесінің маманы, суда жүзуге нұсқаушы, балалар оқыстан ауырып қалған жағдайда тиісті ем-дом жасайтын медбикелер мен стамотолог та бар. Күнделікті 5 мезгіл ыстық тамақпен қамтамасыз ету жолға қойылған. Тынығу жайында бүгінгі таңда Арыстан 150 бала, Жалағаштан 40, Қармақшыдан 150, Жаңақорғаннан 30 бала демалуда.
«Біз 150 бала болып, жетекшімізбен бірге Арыстан келдік. Лагерьге келе салып, бассейнге шомылып, футбол ойнап, жаңа достар тауып жатырмыз. Барлығымен тез тіл табысып, уақытты тиімді өткізудеміз. Сосын Жаңақорғанның табиғаты Арысқа ұқсайды екен. Салқын ауа, жасыл желек, таулы мекен. Адамдары да жайдарлы мінезді, бауырмал. Бізге осындай жолдама беріп, тынығуымыз үшін жағдай жасаған сіздей басшыға шын жүректен алғыс айтамыз», – деді арыстық Аянат Жарылқасын.
