Қызылордада «Іскерлік байланыстардың» екінші кезеңі басталады
Kyzylorda-news.kz. «Бизнестің жол картасы 2020» бағдарламасы аясында «Іскерлік байланыстар» құралы бойынша екінші кезеңге құжаттарды қабылдау жүргізіледі.
Аталған құрал бойынша қабылдау ағымдағы жылдың 14 қазан және 8 қараша аралығында өтетін болады. Үміткерлермен сұхбаттасу биыл 9-13 желтоқсан аралығында жүргізіледі.
«Іскерлік байланыстар» құралы халықаралық және шетелдік ұйымдардың қолдауымен шетелдік әріптестермен іскерлік байланыстар орнату арқылы өндірісті модернизациялауға қолдау көрсетуге бағытталған.
Жоба екі кезеңнен тұрады.
Атап айтар болсақ, бірінші кезеңде еліміздің аумағында оқыту жүргізілді. Қатысушылар шетелдік және отандық бизнес-тренерлердің жетекшілігімен өз кәсіпорындарының дамуының бизнес-жоспарын жасау үшін қажетті дағдылар мен білім алатын бизнес-тренингтерден өтті.
Екінші кезең қатысушылар үшін шетелде ақысыз тақырыптық бизнес-тәжірибе жинақтауды көздейді, бұл сонымен қатар шетелдік әріптестермен іскерлік байланыстар орнату мақсатында да жүзеге асырылады.
«Іскерлік байланыстар» жобасының екінші кезеңіне қатысу үшін бірінші кезеңге қатысқандығын растайтын сертификаттың болуы шарт.
Анықтама үшін 40-08-74, 40-02-02 немесе Сall-Center – 8 /727/ 3574303 нөмірлеріне хабарласуға болады.
