Әбдіжәміл Нұрпейісовтің мерейтойына арналған елордадағы шараға Мексика мен Итальядан ғалымдар қатысады
Kyzylorda-news.kz. Бүгін Л.Н.Гумилев атындағы Еуразия ұлттық университетінің телерадио және қоғаммен байланыс кафедрасы Қазақстанның халық жазушысы, Мемлекеттік сыйлықтың лауреаты Әбдіжәміл Нұрпейісовтің 95 жылдық мерейтойына орай «Әбдіжәміл Нұрпейісов әлемі: шеберлік феномені» атты салтанатты жиын өткізеді.
Мерейтойға арналған шара «Ә.Нұрпейісов және XXI ғасырдағы әдебиет пен өнер», «Жазушы тұлғасы және қазіргі БАҚ мәселелері» бағыттары бойынша жүргізіледі.
Салтанатты жиында Нұр-Сұлтан қаласы әкімнің орынбасары Б.Макен, депутат С.Әбдірахманов, академик Ж.Әбділдин, мемлекет және қоғам қайраткері М.Жолдасбеков, мемлекеттік сыйлықтың лауреаты Н.Айтұлы, Мексикадан келген ғалым Х.Эстрада, итальяндық ғалым Д.Сербо, ақын О.Туржан баяндама жасап, сөз сөйлейді.
Мерейтойға ұлт зиялылары, қоғам қайраткерлері, алаштанушы-ғалымдар, Л.Н.Гумилев атындағы Еуразия ұлттық университетінің профессор-оқытушылар құрамы, білім алушылары қатысады.
