БЫЛТЫР ҚЫЗЫЛОРДАДА 350 КӘСІПКЕРДІҢ ҚҰҚЫҒЫ ҚОРҒАЛДЫ
Қызылорда облыстық кәсіпкерлер палатасы өткен жылы 350 кәсіпкердің құқығын қорғады.
Осылайша бизнес өкілдерінің 370 миллион теңге қаржысы өз қалтасында қалды. Кәсіпкерлерге жиі кездесетін кедергілердің басым бөлігі мемлекеттік сатып алу, жер қатынастар саласы және мемлекеттік органдардың әрекеттеріне байланысты. Мәселен, өткен жылы кәсіпкерлер палатасы құзырлы органдармен бірлесіп, бизнесті қорғау бағытындағы шаралар аясында 11 лауазымды тұлғаны жауапкершілікке тартқан. Олардың қатарында Жаңақорған кентінің әкімдігі де бар. Аталған жергілікті атқарушы орган мердігерді жосықсыз деп тану үшін негізсіз талаптар қойған.
– Жаңақорған кенті әкімшілігі мердігер мекемені жосықсыз деп тану туралы сотқа жүгінген. Дегенмен палата өкілдері осы сот процесіне қатысып, кәсіпкердің мүддесін қорғап, нәтижесінде Жаңақорған кенті әкімшілігінің лауазымды тұлғаларын тәртіптік жауапкершілікке тарту жөнінде жеке ұйғарым шығарған. Әрине, алдағы уақытта осындай әрбір дерек бойынша қатаң шараларға тарту туралы мәселені міндетті түрде қоятын боламыз, –дейді облыстық кәсіпкерлер палатасы директорының орынбасары Ғалым Едігеев.
