Сыр Медиа

Kyzylorda-news.kz. Арал ауданының әкімі Мұхтар Оразбаев аудан көлемінде жүргізіліп жатқан әлеуметтік маңызы зор бірнеше құрылыс нысандарын аралап, жұмыс барысымен танысты.

Алдымен қаладағы бой көтерген 250 орындық жаңа оқушылар үйі ғимаратына барып, ішкі әрлеу және монтаждау жұмыстарын көрді. Аталған нысанның құрылысы аяқталуға жақын. Жуық арада пайдалануға беріледі деп күтілуде.

Одан кейін «Жұмыспен қамтудың жол картасы - 2020» бағдарламасы аясында күрделі жөндеуден өтіп жатқан «Арал индустриалды-техникалық колледжінде» болып, жөндеу жұмыстарына қанық болды. Колледж ғимараты екі қабаттан тұрады. Қазіргі таңда жеңімпаз ретінде танылған Қызылорда қаласының «Самат-Мұнай» ЖШС құрылыс жұмыстарын жүргізуде. Жөндеу жұмыстары барысында жергілікті жердің азаматтары да жұмыспен қамтылған.

Мұнан соң ауданға қарасты Октябрь ауылдық округі, Шижаға елді мекеніне ат басын бұрған аудан басшысы жаңадан салынып жатқан медициналық амбулаторияның жай-күйіне қанықты. Мемлекеттік жекешелік әріптестік аясында бой көтерген нысанның құрылыс жұмыстарын мердігер «Алемстрой-1» ЖШС жүргізуде. Бүгінде негізгі құрылыс жұмыстары аяқталған ғимаратта әрлеу жұмыстары қарқынды жүруде. Әлеуметтік нысанды жақын арада ел игілігіне беру жоспарлануда.

Бірнеше құрылыс нысандарында болған аудан әкімі мердігер мекеме басшылары мен жауапты мамандарға тұрғындар үшін маңызы зор ғимараттардың құрылысы сапалы жүргізіліп, уақытылы аяқталуы тиіс екендігін тапсырды.