ШАРУАШЫЛЫҚТЫҢ ӨРІСІН КЕҢЕЙТІП ОТЫРҒАН ШАҢЫРАҚ
Отан отбасынан басталады. Жарасымды отбасының арқасында мемлекет нығаяды және дамиды, халықтың әл-ауқаты өседі. Сонымен қатар жанұядан толық сүйіспеншілікке бөленіп өскен, ер жеткен бала үлкен өмірге ата-анасы бойына дарытқан құндылықтарымен аяқ басып, есейіп ержетеді. Жалпы отбасы аға ұрпақ өкілдерімен: ата-анамен, ата-әжемен, іні-қарындаспен, ағайын туғандармен бауырмалдық байланыс, мызғымас туыстықтан тұрады. Отбасындағы берік қарым қатынас тұлғаның жан-жақты тұрғыдан қалыптасуына, мынау құбылмалы заманда оның көзқарасының беріктігін қамтамасыз ететін асыл ұя саналуы сондықтан. Өңірімізде үрім-бұтағын жайқалтып өсіріп, ұлты мен жұртына адал еңбегімен, өнегелі тәлім-тәрбиесімен танылып жүрген отбасылар жеткілікті. Сондай отбасылардың бірі Қарауылтөбе ауылдық округінде шаруашылықтың өрісін кеңейтіп отырған Досмахановтар отбасы.
Аманкелді ағамыз мен Нәзима апай 55 жыл бір шаңырақ астында өмір сүріп, 6 қыз және 4 ұл тәрбиелеп отыр. Немерелер сүйіп отырған қарапайым еңбек адамдары көпке үлгі болуға әбден лайық.
Отағасы Амангелді Досмаханов зейнеткер, ауылдың құрметті ардагері, Қарауылтөбе ауылдық округі Қоғамдық келісім кеңесінің төрағасы, кәсіпқой емес медиатор.
