Сыр Медиа

Өздеріңіз де білесіздер, күні кеше облыс әкімі Қырымбек Елеуұлы «Кәсіпкерлер үйінің» жаңа ғимаратында бизнес-қауымдастық өкілдері мен мүдделі сала басшыларының басын қосып, «Жаппай кәсіпкерлікті дамыту жылының» 3 жылға ұзартылғандығын жеткізді. Бұл біз үшін керемет жаңалық.

«Кәсіпкерлік жылы» деп жарияланған биылғы жылдың 6 айының өзінде саланы дамытудың кешенді Жол картасы әзірленіп, қаржыландырудың барлық көздерінен 32 млрд. теңге қаржы тартылды. Соның ішінде жұмыссыз азаматтар мен өзін-өзі жұмыспен қамтушыларға шағын несие беру үшін 2 млрд. 94 млн. теңге қаржы қаралды. Бүгінгі күннің өзіне «Қызылорда» инвестициялық орталығы арқылы 280 жоба, «Ауыл шаруашылығын қаржылай қолдау қоры» АҚ Қызылорда облыстық филиалы арқылы 138 жоба қаржыландырылды. Негізгі басымдық ауылдағы ағайынға беріліп отыр.

Мұнан өзге, жыл басында инновациялық жобалар үшін жарияланған қайтарымсыз грантқа 200 млн. теңге бөлініп, байқау қорытындысымен 224 жоба жеңімпаз атанды, қаржыландырылды. Айта кету керек, биыл инновациялық жобаларға арналған гранттарға бөлінген қаржы өткен жылмен салыстырғанда екі есеге артты.

Осы және өзге де көрсетілген мемлекеттік қолдаудың нәтижесінде биылғы жылдың өзінде жұмыс жасап тұрған кәсіпкерлік субъектілері 11 пайызға артты. Қазір облыстағы шағын және орта кәсіпкерлік саласында 84 250 адам жұмыс жасауда. Жыл соңына дейін бұл көрсеткіш өсетіні сөзсіз.

Міне, бұл бірлесе 6 айда қол жеткізген жұмыстарымыздың бір бөлігі ғана. Енді осы қарқынды 3 жылға арттырыңызшы: жаңа жұмыс орындары, жаңа кәсіпкерлік нысандары мен қызмет түрлері. Бұл шешімнен біз ұтпасақ, ұтылмаймыз. Әріптестерім бұл жаңалықты қуана қабылдап, қазірдің өзінен жоспарларын жасауда.

Сондай-ақ, тамыз айынан бұрын Қызылорда қаласы Әйтеке би көшесі, 28 мекен-жайында жұмыс жасаған «Кәсіпкерлер үйі» Желтоқсан көшесіндегі «Бастау» бизнес орталығына көшіп, жаңа серпінмен жұмысты жалғастыруда. Нәтижесін алдағы уақытта сөзбен емес, іспен дәлелдейтін боламыз.

Ал әзірше, барлығымызға жаңалық құтты болсын дегім келеді. Тыныштығы тұрақты, экономикасы қуатты елге айналайық. Осы бағытта бірге жұмыс жасауға шақырамын!