Сыр Медиа

Жақында Кәсіпкерлер палатасы басшысының атына аралдық кәсіпкерден хат келді. Хатта кәсіпкер Палата мамандарына алғысын білдіріпті. Назарларыңызға аталған хаттың мәтіні мен кәсіпкерге кеңес беріп, қаржысын еселеуге үлес қосқан Палата мамандарының кеңесін ұсынып отырмыз.

«Біз Арал ауданында «Абдикеров Жұбатыр Жаксыбаевич» шаруа қожалығы мал шаруашылығымен айналысып келеміз. Осы жылы кәсібімізді ұлғайту мақсатында және жем-шөпке тәуелді болмас үшін шөп оратын және пресс жинайтын техникалар алуға бел будық.

Облыстық кәсіпкерлер палатасы қандай техника алу керек, қайдан алу керек, атап айтқанда «жатка валковая» және «пресподборщикті» алуға түсінікті етіп кеңес беріп, инвестициялық субсидия алуға қолдау көрсетті.

Егер Палата тарапынан дер кезінде мұндай қолдау болмаған жағдайда, кешіккендіктен субсидиялаудың жаңа ережесіне кез болып, алатын субсидиямыздың көлемі 1 млн. теңгеден аспайтын еді. Дұрыс әрі уақытылы көмектің арқасында инвестициялық субсидияның 3 млн. теңге көлемінде мемлекеттік қолдауға ие болдық.

Осыған сәйкес, «Ж.Ж.Абдикеров» шаруа қожалығы атынан Палатаның ауылшаруашылығы бөліміне алғыс білдіреміз!», - деп жазылған хатта.

Бұл мәселеге қатысты Палатаның Агроөнеркәсіп кешені бөлімінің бастығы Жасұлан Серіков ойын былайша өрнектеді:

– Бізге күнделікті кеңес алуға кәсіпкерлер келеді. Арал ауданынан «Абдикеров» шаруа қожалығының иесі осы жаз айында хабарласқан еді.Біздің тарапымыздан оған 2 дана ауылшаруашылық техникасын алуға көмек көрсетіліп, әрі қарай тиесінше сол техникаларына кеткен шығынның бір бөлігін субсидия алуға сүйемелдеу алуға болатындығы түсіндірілді. Түсіндіріліп қана қоймай нақты көмек жасадық.

«Инвестициялық салымдар кезінде агроөнеркәсіптік кешен субъектісі шеккен шығыстардың бір бөлігін өтеу бойынша субсидиялаудың» жаңа қағидасы биылғы жылдың 17-қыркүйегінен бастап күшіне енді. Жаңа қағида бойынша субсидияда өзгерістер бар. Мәселен, кейбір қызмет түрлері бойынша артса, енді бірінде кеміді. «Абдикеров» шаруа қожалығы тарапынан жаңа ереже күшіне еніп кеткен жағдайда 3 есе аз алуы мүмкін еді. Осы жайттарды ескере келе, біз кәсіпкерге дер кезінде құжаттарын тапсыруды ұсындық. Дер кезінде бірлесе жұмыс жасаудың нәтижесінде кәсіпкер 3 млн. теңге көлемінде субсидияға ие болды», - деді.

Ауыл шаруашылығы немесе субсидияға қатысты сұрақтар бойынша кәсіпкерлер Палатаға келіп, мамандардан кеңес ала алады. Жауапты маман Жасұлан Серіков.

Байланыс телефоны 8 /7242/ 40-09-81 /ішкі 4316/.