МЕДИЦИНА САЛАСЫНЫҢ МАЙТАЛМАНЫ
Қызылорда облысының қоғамдық-саяси тарихының мемлекеттік архивінің ұйымдастыруымен Қызылорда медициналық колледжінің мәжіліс залында белгілі медицина маманы Ернияз Омаровтың 85 жасқа толуына орай «Медицина саласының майталманы» тақырыбында кездесу өтті.
Өңірдің медицина саласын дамытуға үлес қосқан Ернияз Омарұлының өмір жолын кейінгі ұрпаққа өнеге ете отырып, жастарды еңбексүйгіштікке, адамгершілік пен азаматтыққа тәрбиелеуді көздеген шарада Қызылорда облысының қоғамдық-саяси тарихының мемлекеттік архивінің басшысы Г.Ахметова Ернияз Омарұлының архив қорындағы жеке тектік құжаттарына тоқталып өтті.
Шара барысында медициналық колледж директоры Салтанат Тасмағамбетова, қалалық аурухананың бас дәрігері Бауыржан Төлегенов, қалалық аурухананың ардагері Есентай Бейсетаев Ернияз Омарұлының қызметі жайлы айтса, колледж ардагерлер кеңесінің төрағасы Ахмет Шарапатов студенттік кезеңіне тоқталып өтті. Қатысушылар қонақтарға сұрақтар қойып, пікір алмасты.
Шара соңында колледж оқушылары Ернияз Омарұлына арналған өлең шумақтарын орындап, ән-жырдан шашу шашты. Сый-сияпат көрсетілді.
Медицина саласының белгілі маманы Ернияз Омарұлы өзіне көрсетілген құрметке алғысын жеткізіп, ұйымдастырушыларға жылы лебізін білдірді.
