ЕҢ ҮЗДІК ЖЫЛ МҰҒАЛІМІ
Ұстаздар күні қарсаңында Астана қаласында республикалық «Үздік педагог-2018» республикалық конкурстың жеңімпаздары марапатталды. Қызылорда қаласы химия-биологиялық бағыттағы Назарбаев Зияткерлік мектебінің биология пәнінің эксперт мұғалімі Дариха Мұнарбаева жеңімпаздар қатарынан көрінді. Ұстаз «Үздік педагог-2018» атағына ие болып, 2,4 млн тенге сыйақыны иемденді.
Аталған конкурс қоғамдағы мұғалім әлеуетін көтеру үшін 2012 жылдан бері ұйымдастырылып келеді. Биыл конкурсқа үміткерлер саны 4000-ға жеткен. Конкурс талабына сай келген орта мектептерден 48 мұғалім және 16 колледж оқытушысы ақтық мәреге жетіп, жеңімпаз атанды.Жеңімпаздардың бірі - Қызылорда қаласы химия-биологиялық бағыттағы Назарбаев Зияткерлік мектебінің биология пәнінің эксперт мұғалімі Дариха Мұнарбаева.
Ол білім саласында 30 жылдан аса уақыт еңбек етіп келеді. Шәкірттері республикалық, халықаралық олимпиадалардың жеңімпаздары. Қалалық «Үздік педагог-2011», «Үздік мектеп директоры-2002» және мұғалімдер арасында өткізілген бірнеше пәндік олимпиадалардың жеңімпазы. Білім саласына сіңірген еңбегі үшін бірнеше дүркін Қызылорда облысы әкімінің Алғыс хаты, Білім және ғылым министрлігінің Құрмет Грамотасымен марапатталды. Өмір бойы оқуды ұстаздық ұстаным ретінде қабылдаған ұлағатты ұстаз халықаралық конференцияларға қатысып, білімін жетілдірудің негізінде кәсіби деңгейінің шарықтауына жол ашты. Еңбектенуге ден қойған Дариха Абсаматқызы «Action Research», «Lesson Study» жобалары аясында аянбай еңбек етіп, бірнеше әдістемелік құралдардың авторы атанған.
