Оқушылар зияткерлік сайыста білімін сынады
Сырдария ауданы Асқар Тоқмағанбетов ауылындағы №135 орта мектеп ұжымы тағылымы мол іс-шара өткізді. Бұл жолғы іс-шара "Рухани жаңғыру" бағдарламасының "Өзгерістерді өзіңнен баста" кіші бағдарламасы аясында ұйымдастырылды.
"Үш тілдің патшалығы" атты зияткерлік ойынға аталған орта мектептің жоғарғы сынып оқушылары қатысты. Олар 6 кезең бойынша сынға түсіп, өз өнерлерін көрсетті.
Сайыс барысында Елбасының "Рухани жаңғыру" бағдарламасы мен "Ұлы даланың жеті қыры" атты мақаласы кеңінен насихатталды. №135 А.Тоқмағанбетов атындағы орта мектеп директорының тәрбие ісі жөніндегі орынбасары Қ.Ұзақбаеваның айтуынша, оқушылардың білімін кеңейтуде зияткерлік сайыстардың алар орны ерекше. Сайысқа оқушылар белсене қатысу арқылы өз ойларын ашық айтуды үйренеді және көпшілікпен жұмыс жасауға дағдыланады.
Айта кету керек, аталған зияткерлік ойын жоғары деңгейде өтті. Сайыс соңында жеңімпаз атанған оқушылар "Алғыс хатпен" марапатталды.
