ЕКІ МИЛЛИОН ТЕҢГЕНІ ИЕСІНЕ ҚАЙТАРДЫ
«Астана–Ақтөбе» бағытына қатынайтын жолаушылар пойызының жолсерігі, қазалылық Ержан Әденов пойыз жолаушысы жоғалтып алған екі жарым миллионнан астам теңгені иесіне қайтарды.
Ержанның айтуынша пойыз сол күні Астанадан Ақтөбеге келіп тоқтайды. Жолаушылардың бәрі шыққасын жолсерік вагондарды аралап жүріп, ақшасы бар әмиян тауып алады. Осы оқиға жайлы пойыз басшысына хабарлаған соң, акт толтырылып, билет арқылы әмиянның иесін анықтайды.
- Мен өзім бір ерекше іс жасадым деп айта алмаймын, - дейді Ержан Әденов. – Менің орнымда кез-келген адал азамат осылай істер еді.
Ержан Қ.Сәтпаев атындағы Қазақ Ұлттық техникалық университетінің түлегі. Уақытша жолсерік болып істеген ол қазір Қазалы агротехникалық колледжінде сабақ береді.
