Биылдан бастап мемлекеттік сатып алу заңнамасына өзгерістер енгізілді
Бұл туралы Өңірлік коммуникациялар қызметінде өткен баспасөз конференциясында облыстық мемлекеттік сатып алу басқармасының басшысы Жанзира Ерсейітова мәлімдеді.
"Заңдағы түзетулер 3 бөлімнен тұрады. Біріншіден, сатып алу рәсімдерін жеңілдету үшін баға ұсыныстарын сұратуда тапсырыс берушілерге тауарлардың фирмалық атауларын көрсетуге құқық берілді. Екіншіден, өнім берушілердің біліктілігін арттыруда «қаржылық тұрақтылығы» белгіленді. Ол құрылыс саласында сатып алуды алдын ала іріктеумен ғана жүргізу арқылы құрылысты тездету әрі сапасын арттыру көзделеді. Үшінші түзету, сатып алулар өткізілмесе, оларды қайта өткізу міндеті қойылды. Сонымен қатар, мемлекеттік тапсырысты алса да, сотталғандарды жұмысқа тартпай, барлық жұмыстарды қосалқы мердігерлерге берген «Еңбек» кәсіпорындарына қосалқы мердігерлерді тартуға тыйым салынды", - деді Ж.Ерсейітова.
Сонымен қатар, Қаржы министрлігі 1 наурыздан күшіне енетін облыс және қала, аудандық деңгейде өткізілетін сатып алудың Тізбесін жасақтауда. Бұл мамандарға үлкен талаптар қойып отыр.
