Қызылордада республикалық патриоттық ән фестивалі басталды
Kyzylorda-news.kz. Асқар Тоқмағамбетов атындағы мәдениет үйінде Қазақстан Республикасы Ішкі істер министрлігінің бастамасымен ұйымдастырылып отырған «Жастар жылын» мерекелеуге арналған «Әр жүректе – туған жер!» өңірлік патриоттық ән арт-фестивалі басталды.
Фестивальге Маңғыстау облысы, Батыс Қазақстан облысы, Атырау облысы, Қызылорда облысының Полиция департаменттері, Батыс Қазақстан облысының және Ақтөбе облысының мамандандырылған күзет қызметі басқармалары, Ақтөбе облысының Қылмыстық атқару жүйесінің департаменті және Нұр-Сұлтан қаласы Көліктегі Полиция департаментінің жас қызметкерлері өнер көрсететін болады.
Конкурс вокал номинациясында өткізіледі. Қатысушылар дуэт, трио, квартет ретінде шығармаларын эстрадалық, академиялық және халық стилінде ұсынбақ. Олар вокалдық мәліметтер, репертуардың көркемдік құндылығы, орындау шеберлігі және костюм киюі бойынша бағаланады.
Фестиваль қорытындысын композиторлар, вокалдық шеберлік оқытушылары, мәдениет қайраткерлері мен қызметкерлері қатарынан құрылған қазылар алқасы шығаратын болады.
