Тереңөзекте «Шаншар» театры концерт қойды
16 желтоқсан – Қазақстан Республикасының Тəуелсіздігі күні мерекесі қарсаңында «Абай-Дәулет» ЖШС-і демеушілігімен «Шаншар» әзіл-сықақ театры Сырдария ауданында концерт өткізді, деп хабарлайды Kyzylorda-news.kz аудан әкімінің баспасөз қызметіне сілтеме жасап.
Аудандық мәдениет үйінде өткен концертке Тереңөзек кентінің және С.Сейфуллин, Қалжан ахун, А.Тоқмағамбетов ауылдық округтерінің тұрғындары көрермен ретінде қатысты.
Концерт барысында «Шаншар» әзіл-сықақ театрының өнерпаздары әзілмен өрілген қойылымдарын ұсынып, көрермендерге көтеріңкі көңіл-күй сыйлады.
Жаңа бағдарлама бойынша өнер көрсеткен театр мүшелері аудан тұрғындарының ыстық ықыласына бөленді. «Шаншар» әзіл-сықақ театрының басшысы У.Әбдірайымов Сырдария ауданының өнер сүйер жұртшылығына шынайы ризашылығын білдірді.
Айта кету керек, «Шаншар» әзіл-сықақ театры кеше Бесарық ауылдық округінде де концерт өткізді.
