Сыр Медиа

Қорқыт Ата атындағы Қызылорда мемлекеттік университетінде «Университет аруы – 2019» атты сұлулық байқауы өтті, деп хабарлайды Kyzylorda-news.kz.

Байқаудың ерекшелігі қатысушы қыздар тек сұлулық жағынан сынға түспеді. Оларға байқаудың финалына дейін күн сайын психологиялық сабақтар мен ұлтымыздың салт-дәстүрлері, тәрбиесі, мәдениеті жайлы дәрістер оқылды. 2-ші кезеңге 80 қатысушы ішінен іріктеуден өткен 21 ару өз қолдарынан келетін түрлі ас әзірлеп, жәрмеңкеге келушілерге ұсынды. Бұл кезеңде талапкер қыздардың сөйлеу мәдениеті және адамдармен қарым-қатынасына да көңіл бөлінді. Осы сынақтан ең көп ұпай жинап сүрінбей 13 ару ақтық сынға жолдама алып, гала концертте 5 кезең бойынша бақ сынасты.

Атап айтсақ, ақтық сынның алғашқы кезеңінде аруларды таныстыру болса, одан кейін өз өнерін көрсету сәті болды. Сыр сұлулары іскерлік стильдегі киім үлгісінде сән көрсетіп, салт-дәстүрге қатысты сұрақтарға жауап берді. Оған қоса, қорытынды кезеңде кешкі көйлектермен дефиле көрсетті.

Байқаудың жалпы қорытындысы бойынша бас жүлдені ДО-18-1 оқу тобының студенті Нұрайым Қабден жеңіп алып, «Университет аруы - 2019» атанды. Балжан Әбдікәрімова «1 Вице мисс», Нұржайна Жұматай «2 Вице мисс», Аружан Алпарова «3 Вице мисс» номинациясымен марапатталды.