Қызылордалық Ғалымжан Өміртай жамбы атудан Қазақстан чемпионы атанды
Kyzylorda-news.kz. Жамбыл өңірінде жамбы атудан өткен ҚР-ның V чемпионатында жерлесіміз Ғалымжан Өміртай 1-орынды жеңіп алды. Бұл туралы облыстық дене шынықтыру және спорт басқармасының баспасөз қызметі хабарлады.
Бұл облыс тарихында жамбы атудан алғашқы алтын медаль. Жерлесіміздің мергендігі халықаралық жарыстардың жүлдегері, Әлем чемпионы Абзал Тулыбеков, Ералхан Айкөз, Айтбек Сарыбай сынды мергендерден асып түскені, ұлттық спорт мамандарының өзін таң қалдыруда.
Жарыста үздік нəтиже көрсеткен Ғалымжан 29 ұпай жинап, Қазақстан жеңімпазы атанды.
Ғ. Өміртай – Жаңақорған ауданы Әбдіғаппар елді мекенінде 1999 жылы туылған. Жамбы ату спортымен айналысқанына 3 жыл. Жастар арасындағы Қазақстан чемпионатының екі дүркін қола жүлдегері. №7 Жаңақорған ауданының олимпиадалық резервтің мамандандырылған балалар-жасөспірімдер мектебінде ұлттық ат спорты түрлері бөлімшесінің жаттықтырушысы.
Айта кетейік, Қызылордалық шабандоздар көкпар жəне аударыспақ жарыстарына қатысуда. Ел чемпионаты 26 мамыр күні аяқталады.
