«ҚАЗАҚСТАНДАҒЫ 100 ЖАҢА ЕСІМ»: ВЕНЕРА ГАФУРОВА
«Қазақстандағы 100 жаңа есім» жобасының екінші кезеңі бойынша үміткерлердің қатарында Қызылорда облысының кәсіпкері Венера Гафурова бар. Қашанда қолдан келген көмегін аямай, қайырымдылық шараларына қатысып, мұқтаждарға қол ұшын созатын Венера жаны жомарт жан.
Ол Қызылорда облыстық Қазақстан халқы Ассамблеясының мүшесі. Татар этно-мәдени бірлестігінің белсенді мүшесі ретінде үнемі мәдени-көпшілік шараларға қатысады. Әлеуметтік жауапкершілікті сезінген кәсіпкер мұқтаж жандарға қол созып, қайырымдылық шараларға бастамашылдық танытады. Беделді де, белсенді нәзікжан бүгінде 50-ге жуық адамды жұмыспен қамтып отыр. Әлеуметтік жағынан аз қамтылған, көпбалалы, тұрмысы төмен отбасыларына, мүгедек жандарға қаржылай дәрі-дәрмек және материалдық көмек көрсетеді.
Венера Гафурова Қарағанды облысы су тасқынынан зардап шеккендерге алғашқы көмек қолын созғандардың бірі. Аймақтағы «Атамекен» отбасы үлгісіндегі балалар ауылына тұрақты көмек беріп келеді. 2016 жылы Қызылорда облысы әкімінің Алғыс хаты мен Құрмет грамотасының иегері атанды. ІІІ республикалық меценаттар форумында «Жомарт жан» медалімен марапатталған.
Ол 1989 жылы 9 маусымда Қызылорда қаласында дүниеге келген. 2007 жылы Т.Рысқұлов атындағы Қазақ экономикалық университетін «Нархоз» экономист мамандығы бойынша, 2013 жылы «МАБ» Халықаралық Бизнес Академиясының магистратурасын бітірген.
Алғаш еңбек жолын «Торғай Петролеум» АҚ-да экономист қызметінде бастаған ол 2007-2013 жылдары «Энергомонтажавтоматика» ЖШС қаржы директоры лауазымында болды. Бес жылдан бері мұнай өнімдерін көтерме сататын «Alef trade» ЖШС директоры қызметін атқарады, сондай-ақ ол «Персона» сұлулық салонының иесі.
