Сыр Медиа

Елбасы Нұрсұлтан Назарбаев «Болашаққа бағдар:рухани жаңғыру» атты бағдарламалық мақаласында «Болашақта ұлттың табысты болуы оның табиғи байлығымен емес, адамдарының бәсекелік қабілетімен айқындалады» деп XXI ғасырдағы білімнің алатын орнына тоқталған болатын.

Әлемде өз дамуы барысында білім саласында тиімді реформалар жүргізіп, солардың нақты жемісін көріп отырған мемлекеттер аз емес. Сингапур, Малайзия, Финляндия, Норвегия, Германия, Ұлыбритания елдері заман талабына, халықтың сұранысына, тарихи қалыптасқан ұлттық дәстүрге сәйкестендіріп, әр оқушының қажеттілігін қанағаттандыруға бағытталған оқыту бағдарламалары арқылы білім беруде. Яғни, адам капиталын дамытуға бағытталған бағдарламаларды жүзеге асыруда.

Мектептегі басты тұлға – мұғалім екендігі белгілі. Сондықтан, Ы.Алтынсарин «Маған жақсы мұғалім бәрінен қымбат, өйткені, мұғалім – мектептің жүрегі» деп бекер айтпаған.

Технологиялар ерекше дамыған заманның өзінде білім сапасын қамтамасыз етудегі мұғалімнің рөлін ешнәрсемен ауыстыруға болмайтынын халықаралық зерттеулер көрсетуде. Білімді ұрпақты, бәсекеге қабілетті мамандарды білікті мұғалімдер, кәсіби тұрғыдан жан-жақты дамыған кемел ұстаздар ғана тәрбиелей алады. Жаңа формация мұғалімі мобильді, үнемі шығармашылық ізденісте жүретін, жаңартылған білім беру мазмұнын терең меңгерген, оқушыларда XXI ғасыр дағдыларын қалыптастыра алатын тұлға болуы қажет.

Соңғы жылдары елімізде ұстаздар жаңартылған білім бағдарламасыбойынша біліктіліктерін «Өрлеу» біліктілікті арттыру ұлттық орталығында» және «Назарбаев зияткерлік мектептері» жанындағы Педагогикалық шеберлік орталығында арттыруда.Жаңа мазмұнмен қамтылған бұл білім бағдарламасы жас ұрпаққа білім берумен шектелмей, алған білімдерін өмірде қолдануға, сыни тұрғыда ойлауға, ғылыми-зерттеушілік және жобалау жұмыстарын кешенді бағдарламалар негізінде жүргізе алуға үйретеді.

Қазақстан Республикасының «Білім туралы» Заңында педагог қызметкерлердің бес жылда бір рет біліктілігін арттыруға құқығы бар деп көрсетілген.

Қазіргі жылдам өзгеріп отырған, толассыз ақпараттар ағынының дәуіріндеүздіксіз өзгеріске ұшырайтын білім беру үрдістерін және оны оқытудың инновациялық әдіс-тәсілдерін дер кезінде түсініп, оны оңтайлы пайдалана алуда педагогтер үшін біліктілік арттыру курстарының маңызы зор. Ұрпақ тағдырын өз мойнына алған мұғалім әлемде болып жатқан жаңалықтардың шын мәніндегі жаршысы болуы тиіс. Білгенге маржан, білмеске арзан көрінетін білім саласының өзекті мәселелері, шын мәнісінде, телегей теңіз.

Сондықтан, ұстаздардың жиі біліктіліктерін арттырып, білімдерін жетілдіріп отыруы мемлекет үшін де, болашақұрпақүшін де маңызды да, жауапты іс. Осы тұрғыдан қарағанда,педагогтердің үш жылда бір рет біліктіліктерін арттыру арқылы еліміздің білім саласының деңгейін әлемдік стандарттарға теңестіруге болады.

Биылғы жылы Елбасымыздың тапсырмасына сәйкес қабылданатын «Педагогтардың мәртебесі» туралы заңға 3 жылда бір рет біліктілігін арттыру мәселесі енгізілсе, еліміздің барлық педагогтеріне көрсетілген үлкен әдістемелік көмек болар еді деген сенімдеміз.

«Ел боламын десең, бесігіңді түзе» дегендей, сол бесікті түзетіп, түлететін ұстаз мойнына үлкен жауапкершілікті жүктей келе, уақыт сынынан сүрінбей өту үшін, біліктілікті уақытылы арттырып, кәсіби жағынан үнемі шыңдалу отыруы қажет.