Сыр Медиа

    Арал ауданында жергілікті кәсіпкер Ақыл Сәдуақасова  «Туған жер» арнайы жобасы аясында жергілікті әкімдік пен прокуратураның бастамасына қолдау танытты.

    Кәсіпкер «Атамекен» бағдарламасын жүзеге асыру бағытында «Әкімшілік құқық бұзушылықтың бірыңғай тізілімі» жобасы енгізілген планшеттер мен принтер жиынтығын алуға көмек көрсетті.

    Арнайы жүйеге қосылған құрылғыларды аудан әкімі М.Оразбаев аудандық ішкі істер бөліміне табыстап, жүйенің артықшылықтарына тоқталды. Жаңа жүйе әкімшілікті істерді рәсімдеуде уақыт үнемдеуге сеп болады. Мәселен, бүгінгі таңда бір хаттаманы қағазға жазып тұруға 15-20 минут кетсе, енді планшет арқылы 3-5 минутта толтыруға болады. Яғни, планшет құрылғысына құқық бұзушының ЖСН нөмірін енгізсе болғаны, барлық мәлімет база арқылы көрініп тұрады.

    Аталған жоба «Сандық Қазақстан» мемлекеттік бағдарламасына сәйкес жүзеге асырылып жатқанын атап өту қажет. Сондай-ақ, келешекте планшеттердің санын көбейту көзделіп отыр.