БРАКОНЬЕРЛІККЕ ЖОЛ ЖОҚ!
Аймақта жүргізілген «Уылдырық-2017» акциясы нәтижесінде балық қорғау заңнамасын бұзудың 124 дерегі анықталып, теңіз маржанын заңсыз аулағандардың жолы кесілді. Бұл туралы Өңірлік коммуникациялар қызметінде өткен баспасөз конференциясында Қызылорда облыстық орман шаруашылығы және жануарлар дүниесі аумақтық инспекциясының басшысы Ғалымжан Орақбаев мәлімдеді.
Сондай-ақ, жыл басынан бері табиғат пайдаланудың заңдылығын сақтауды бақылау мақсатында рейдтер ұйымдастырылып, нәтижесінде 491 құқық бұзушылық анықталды. Оның 43 фактісі аңшылық, 10 дерегі орман саласына қатысты болса, қалғаны балық шаруашылығымен байланысты. Тексеру жұмыстарына қарамастан браконьерлік фактілері азаяр емес. Осыған орай инспекция өкілдері тұрғындарға табиғат пайдалану ережелерін сақтауды ескертеді.
