Елімізде үш түрлі әлеуметтік төлемнің мөлшері 30% көбейеді
Kyzylorda-news.kz. Қазақстанда үш түрлі әлеуметтік төлемнің мөлшері 30 пайызға көбейеді, деп хабарлайды «Хабар 24».
Мұндай өзгерістер міндетті әлеуметтік сақтандыру мәселелерге қатысты заң жобасына енгізілген. Еңбек және халықты әлеуметтік қорғау министрі Бердібек Сапарбаев бұл құжатты Мәжіліс депутаттарына ұсынды. Оған сәйкес келер жылдан бастап мүгедектер, асыраушысынан айырылған және еңбек ету қабілеттілігін жоғалтқан азаматтарға берілетін жәрдемақы ең кемі 5-7 мың теңгеге өспек. Мемлекет тарапынан көрсетілетін бұл қолдауға бас-аяғы 200 мыңдай адам ие болады. Төменгі палата мақұлдаған Заң жобасы енді Сенаттың қарауына түседі.
«Әлеуметтік төлемдер ұзақ мерзімде төленеді. Оның мөлшері елдегі инфляцияға байланысты көтеріліп тұрады. Бұл енді 5 пайыздан 8 пайызға дейін. Қандай инфляция болады, сондай әлеуметтік төлемдер көтеріледі. Бюджеттен төлейтініміз бар, содан кейін әлеуметтік қамту мемлекеттік қорынан төленеді», - дейді ҚР Еңбек және халықты әлеуметтік қорғау министрі Бердібек Сапарбаев.
