Сыр Медиа

    ҚР Тәуелсіздік күні қарсаңында «Нұр Отан» партиясы жанындағы «Жас Отан» Жастар қанаты Қызылорда облыстық филиалының ұйымдастыруымен «Ақмешіт» гуманитарлық-техникалық институтында Елбасы Н.Ә. Назарбаевтың «Болашаққа бағдар: Рухани жаңғыру» бағдарламалық мақаласы аясында «Өшпес даңқ!» атты танымдық конференция өтті. Аталмыш конференцияға Қорқыт Ата атындағы Қызылорда мемлекеттік университетінің «Қорқыттану және өлке тарихы» ғылыми зерттеу институтының ғылыми қызметкері Бақытжан Ахметбек, «Ақмешіт» гуманитарлық-техникалық институтының тарих пәнінің оқытушысы Гүлнәр Жаркенова, «Жас Отан» Жастар қанаты Қызылорда қалалық бөлімшесінің басшысы Талғат Тілес, колледж оқытушылары, жасотандықтар, студенттер, БАҚ өкілдері қатысты.

    Жиында «Жас Отан» Жастар қанаты Қызылорда қалалық бөлімшесінің басшысы Талғат Тілес ұлт тарихының маңызды оқиғаларына тоқталып, Алаш арыстарының ел үшін атқарған еңбектері жайлы айтты.

    – Елбасымыз «Болашаққа бағдар: Рухани жаңғыру» бағдарламалық мақаласында атап көрсеткендей, тарихымыздан тағылым алу міндетіміз. Осы Алаш алыптарының, зиялыларымыздың елге жасаған қызметін әрбір жас білуі тиіс,- деді ол өз сөзінде.

    Конференцияда сөз алған Б. Ахметбек Елбасымыздың «Мәңгілік ел» идеясының бастауы саналатын тарихи оқиғалар жайлы тарата айтып, ұлттық жаңғырудағы жастардың рөліне тоқталды.

    Шарада студенттер тарихи тұлғалар жайлы танымдық бейнеролик көріп, конференцияға қатысушылармен еркін пікір алмасты.