Қазақстан 61 елмен визасыз режим орнатты
Kyzylorda-news.kz. Қазақстан 61 елмен визасыз режим орнатты, деп хабарлайды Sputniknews.kz.
Бұл туралы Қазақстан Республикасы ІІМ көші-қон қызметі комитеті мәлімдеді.
«Көші-қон қызметі органдарында тіркелу қажеттілігінсіз 30 тәулікке дейін 45 елге бір жақты тәртіпте визасыз режим берілді", - деп жазылған хабарламада.
Екі жақты негізде 19 елмен (Армения, Беларусь, Грузия, Қырғызстан, Молдова, Моңғолия, Ресей және Украина 90 тәулікке дейін, Әзербайжан, Аргентина, Бразилия, Оңтүстік Корея, Куба, БАӘ, Сербия, Тәжікстан, Түркия және Эквадор 30 тәулікке дейін, Гонконг 14 тәулікке дейін) келісім жасалды.
Шетелдіктер Қазақстанда қалай тіркеледі
«Халықтың көші-қоны туралы" заңға сәйкес шетелдіктер Қазақстан Республикасына келгеннен кейін бес күннің ішінде тіркелуге міндетті.
Тіркеу бірнеше тәсілмен ресімделеді:
– экономикалық дамыған және әлеуметтік тұрақты 56 елдің азаматтары, сондай-ақ барлық шетел азаматтары үшін тіркеуді Қазақстанға кіру кезінде шекара қызметі ресімдейді;
– мекенжай визалары бойынша тіркеу шақыруды ресімдеу кезінде жазылады, шекараны кесіп өту кезінде іске қосылады;
– электронды түрде визалық көші-қон порталы немесе электронды үкімет порталы арқылы, бұл ретте қабылдаушы тараптың электронды мекенжайына тіркеу карточкасы келіп түседі;
– қабылдаушы тарап көші-қон қызметінің аумақтық бөлімшесіне жеке жүгінген кезде, онда тіркеу куәлігі беріледі.
