Биыл Қызылорда облысында мектепке баратын оқушылар саны күрт өскен
Kyzylorda-news.kz. Биыл Сыр еліндегі 293 мектепте 164 500 оқушы мектепке келеді. Бұл туралы Қызылорда облыстық білім басқармасының басшысы Майра Мелдебекова хабарлады.
Биыл оқушы саны өткен жылдармен салыстырғанда 10 мыңға көбейген. Оның ішінде 1-сыныпқа келетін оқушылар саны жобамен 2500-ге артады. Басқарманың есебі бойынша облыста 1-сыныпқа 21553 оқушы қабылданады. Оқушылар санының өсуі негізінен Қызылорда қаласында байқалған.
«Облыста қазіргі таңда балабақшалар саны 667-ге жетіп, онда 61 мың бала тәрбиеленуде. Балабақшалардың 72% жеке секторда. Арал, Қазалы аудандарынан 85 орынға арналған 2 жеке балабақша, Қызылорда қаласынан 140 орынға арналған 1 мемлекеттік балабақша ашылды», - дейді Майра Мелдебекова.
Айта кетейік, аймақта жеке-меншік балабақшалардың үлесі барлық балабақшаның 72%-ын құрайды.
