Сыр Медиа

Kyzylorda-news.kz. «Жастар жылының» аясында Жаңақорған ауданындағы «Талдысу» олимпиадалар және қосымша білім беру орталығында «Жастар-Отанға!» республикалық жастар лагері өтіп жатыр. Шараны облыстық жастар саясаты мәселелері басқармасының тапсырысы бойынша «Медиа Жұлдыз» Қоғамдық қоры ұйымдастыруда.

Жастардың үздік идеяларын қолдау мақсатындағы лагерьге «Jas Otan» Жастар қанаты мүшелерімен қатар республиканың әр аймағынан 100-ден аса белсенді, сондай-ақ мүмкіндігі шектеулі, әлеуметтік тұрмысы төмен отбасынан шыққан, NIT санатындағы жастар қатысуда.

«Жастар-Отанға!» республикалық жастар лагерінде бүгінгі буынның әлеуметтік жауапкершілігін арттырып, дарынды жастардың ұтқыр идеялары мен жобаларына қолдау көрсету, әр аймақтан жиналған жастардың бір-бірімен және белгілі тұлғалармен тікелей диалог құруына ықпал жасау көзделген.

Бұл күндері арнайы жоба байқауынан өзге түрлі ойындар, спорттық сайыстар өткізіліп, үздік деп танылған жеңімпаздарға арнайы дипломдар табысталады.

Айта кету керек, жастар лагерь аясында бір кездері Қыпшақ хандығы, Ақ Орда, Қазақ хандығының астанасы болған «Сығанақ» қалашығымен, Төлегатай-Қылышты ата, Қорасан ата кесенесімен, Ақтас мешітімен, «Сауран» қалашығымен арнайы танысады.