Сыр Медиа

    Жалағаш ауданы әкімінің Жаңа жылдық шыршасы «Айбибі» салтанат сарайында аудан жастарының бастамасымен ерекше жағдайдағы балалардың қуанышына ұласты. Мерекелік шараның алғы сөзін аудан әкімінің орынбасары Ж.Тажмаханов алып, барша жұртшылықты және балаларды келе жатқан Жаңа жыл мерекесімен құттықтады. Ауданның ағымдағы жылғы білім саласындағы жетістіктеріне тоқталып, Жаңа жыл әрдайым жақсылығымен келсін деп өз тілектестігін білдірді.

    Сонымен қатар, салтанатты шарада кент ардагерлер кеңесінің төрағасы Б.Көштаев бүлдіршіндерді Жаңа жылдарымен құттықтады. Кеш барысында өнер көрсеткен балаларға Аяз Ата мен Қаршақыз түрлі сыйлықтар табыстады. Шыршаны айнала билеген бүлдіршіндердің қуанышында шек болмады. Шыршаны айнала ән салған 100-ден астам балаға тәттілер үлестіріліп, барлығы сыйлыққа ие болды.