Қызылордада тұрмыстық зорлық-зомбылық әрекеті азайған
Kyzylorda-news.kz.
Қызылорда қаласындағы «Aray city mall» сауда кешенінде «Әйелдерге қатысты зорлық-зомбылықсыз 16 күн» атты акциясы өтті. Акция барысында ерікті жастар «Зорлық-зомбылықсыз қоғам» атты ұранымен флэшмоб ұйымдастырды.
Акцияның негізгі мақсаты – әйелдерге қатысты зорлық-зомбылық туралы айту, тұрмыстық зорлық-зомбылықтың алдын алу, ана мен баланы қорғауға хабардар ету деңгейін арттыру, отбасылық-тұрмыстық қарым-қатынастар саласындағы ақпараттық-насихаттау жұмысы болып табылады.
Сонымен қатар ұйымдастырушылық мәселелерін шешу үшін іс-шараға мүдделі мемлекеттік органдардың және үкіметтік емес ұйымдардың өкілдері қатарынан жұмыс топтары құрылды.
Аталған мәселе туралы жадынамалар, ақпараттық түсіндірмелер қоғамдық орындарда таратылды.
«Аймақта жыл басынан бері әйелдерді зорлық-зомбылықтан қорғау тобымен 69 қылмыстық әрекет тіркелген. Бұл көрсеткіш өткен жылдың 10 айында 93-і құраған болатын. Былтырғыға қарағанда биыл қылмыстық әрекет азайды дегенмен, статистикалық мәліметтер бойынша, тұрмыстық зорлық-зомбылық әрбір үшінші отбасында кездесіп, тіркелген қылмыстардың 30 пайызын құрайды. Орын алған қылмыстардың негізгі себептері ұрыс-керіс, қызғаныш, маскүнемдік, әлеуметтік жағдайдың төмендігі. Үйдегі жанжал кәмелетке толмағандар арасындағы қылмыстың өсуіне де әкеп соғуда», - делінген облыстық Полиция департаментінің баспасөз қызметінің хабарламасында.
