ЕЛБАСЫ ЖОЛДАУЫ – ЖАҢҒЫРУ ЖОЛЫ
Қорқыт Ата атындағы Қызылорда мемлекеттік университетінің ғылыми-техникалық кітапханасында Елбасы Н.Ә.Назарбаевтың дәстүрлі «Төртінші өнеркәсіптік революция жағдайындағы дамудың жаңа мүмкіндіктері» атты Жолдауына байланысты ақпараттық сағат өтті. Бұл туралы университеттің баспасөз қызметі хабарлады.
Кітапханашы Ұмытшақ Бисенова Елбасы жолдауындағы көрсетілген 10 міндетке тоқталып өтті.
- Елбасымыз Н.Назарбаевтың жыл сайынғы Қазақстанға жолдауынан тың жаңалықтар күтіп, болашаққа сенімімізді ұштайтынымыз рас. «Төртінші өнеркәсіптік революция жағдайындағы дамудың жаңа мүмкіндіктері» атты жолдауында 10 міндетті алға қояды. Соның ішінде адами капиталдың сапасы, жаңа білімді меңгертуге бейімдеуге баса назар аударылды. Білім саласында жаңартылған мазмұн, оқытушылардың біліктілігін арттыру, білім беруде ақпараттық технологияларды қолдану, әлемдік университет кампустарын ашу, жастарымыздың интеллектуалды қабілетін арттыру қажеттігі айтылды. Жолдау тапсырмаларын орындауға ат салысу әрбір қазақстандықтың міндеті деп білемін, - деді ол.
Кітапхана қызметкерлері болашаққа тың серпіліс беретін Елбасы жолдауын әрдайым қолдап, оқырмандарға насихаттау мақсатында оқу ғимараттарында орналасқан қызмет көрсету бөлімдерінде «Елбасы жолдауы – жаңғыру жолы», «Төртінші өнеркәсіптік революция - дамудың жаңа мүмкіндігі», «Жаңа ғасыр және сандық технология» тақырыбында арнайы көрмелерді оқырмандар назарына ұсынуда.
