СУДЬЯЛАР ЕЛБАСЫ ЖОЛДАУЫН ТАЛҚЫЛАДЫ
Қызылорда облыстық соты ұжымы Елбасының Қазақстан халқына арнаған кезекті Жолдауын талқылады.
Іс-шараға облыстық соттың төрағасы, алқа төрағалары, судьялар және соттар әкімшісі басшысы мен сот мамандары және БАҚ өкілдері қатысты.
Сот төрағасы Қамбар Нұрышев Елбасының «Төртінші өнеркәсіптік революция жағдайындағы дамудың жаңа мүмкіндіктері» Жолдауының маңызына тоқталып, Мемлекет басшысы жаңа әлемге бейімделу мен жетістікке жету үшін нақты 10 міндетті тапсырма бергенін атап өтті.
Жиын барысында Қызылорда қалалық сотының судьясы Меруерт Тоғызбаева төртінші өнеркәсіптік революция жағдайындағы даму міндеттеріне жайлы айтты. «Ақылды технологиялар» – агроөнеркәсіп кешенін қарқынды дамыту мүмкіндігі, көлік-логистика инфрақұрылымының тиімділігін арттыру, құрылысқа және коммуналдық секторға заманауи технологияларды енгізу, тиімді мемлекеттік басқару, жемқорлықпен күрес және заңның үстемдігі елімізді жаңа белеске көтеретінін жеткізді.
Судьялар жолдаудың тоғызыншы міндеті жемқорлықпен күрес және заңның үстемдігі туралы ойларымен бөлісіп, биыл қаңтар айынан бастап Қылмыстық-процестік кодекске енгізілген өзгерістер бойынша қаралған сот істеріне шолу жасады.
