Қазақстандықтардың зейнетақы жарнасының көлемі өсті
Kyzylorda-news.kz. Биыл елде жеке зейнетақы шоттарының саны 1 миллионға артып, 11 миллионнан асты, деп хабарлайды «Хабар 24».Шоттардың басым бөлігі сәуір мен мамыр айларында ашылған. Азаматтардың зейнетақы жарнасының көлемі де артып келеді. Мәселен, жыл басынан «Бірыңғай жинақтаушы зейнетақы қорына» қазақстандықтар 428 млрд теңге аударған. Былтырғы кезеңмен салыстырғанда көрсеткіш шамамен 12%-ке жоғары.
408 млрд теңге немесе жалпы көлемнің шамамен 95%-і – міндетті зейнетақы жарналары бойынша түскен қаржы үлесі. Ал ерікті зейнетақы жарнасы бойынша 134 млн теңге кіріс бар. Қаржыны көп көлемде әдеттегідей заңды тұлғалар аударған. Ал бірыңғай жиынтық төлем жасаушылардан келген жарна көлемі 2 млрд теңгеге жуықтайды. Прогресс көбіне сәуір айында болды. 1 айдың ішінде азаматтар 3 миллионнан астам жарна төлеген. Өсім азаматтарға әлеуметтік жәрдемақы аударылған кезбен тікелей байланысты. Бірақ мамыр айында бірыңғай жиынтық төлем көлемі күрт азайды. Небәрі 300 мың азамат қатысқан. Жалпылай алғанда, «Бірыңғай жинақтаушы зейнетақы қоры» ұсынған деректерге сүйенсек, биыл елде белсенді салымшылар саны артқаны байқалады.
