ҚАРМАҚШЫДА БАЛАЛАР ТЫНЫҒУ ЛАГЕРІ САЛЫНЫП ЖАТЫР
Бұл туралы өңірлік коммуникациялар қызметінде өткен баспасөз мәслихатында Қармақшы ауданының әкімі Сұлтан Мақашов мәлімдеді.
– Балалар тынығу лагерінің құрылыс жұмыстары былтыр басталды. Құны 1 млрд 292 миллион теңгені құрайтын 150 орындық лагерь алдағы күзге дейін пайдалануға беріледі деп жоспарланып отыр, - деді аудан әкімі.
Ауданда құрылыс жұмыстарының көлемі 3,2 млрд. болып, өткен жылмен салыстырғанда 5,3 есеге өсті. 2018 жылы – 9,5 млрд. Қуаңдария ауылындағы апаттық жағдайдағы мектеп құрылысына 476,7 млн. теңге бөлініп, пайдалануға берілді. Нәтижесінде аудандағы апаттық жағдайдағы мектептер толығымен жойылған.
Сонымен қатар, Жосалы кентіндегі 300 орындық №183 мектеп ғимаратының құрылысына 798,9 млн. теңге қаржы бөлінді. Білім ошағы осы жылдың мамыр айында пайдалануға беріледі деп күтілуде.
Айта кетейік, өткен жылы Жосалы кентінде 90 орындық екі балабақшаның (№3 «Ертөстік» және №5 «Айгөлек») құрылысына 497,8 млн. теңге бөлініп, қолданысқа берілген еді.
