ҚЫЗЫЛОРДАДА СТАРТАП ЖОБАЛАР ӨНДІРІСТЕ ҚОЛДАНЫЛАДЫ
Сыр өңірінде бастамашыл жастардың үздік стартап жобалары қаржыландырылады.
Өндіріс, құрылыс, энергетика және медицина салалары бойынша студенттер мен мектеп оқушыларының ұсынымдары инновациялық көрмеде таныстырылды. «Жас дарындардың зияткерлік өнімдеріне қолдау көрсету арқылы Елбасы Жолдауында айтылған ғылымға негізделген бәсекелестіктің даму динамикасын үдете аламыз», – дейді шараны ұйымдастырушылар.
Мобильді қондырғымен дауыс арқылы басқарудың әзірге қарапайым түрлері қолданыста. Олар: төсек-орын ауыстыру, дәрігер шақыру және емдік шара уақытын еске салу. Құрастырушылардың алдында енді «Ақылды палата» жобасы аясында қызмет түрлерін кеңейту жоспары тұр.
Фархад Ділманов, Назарбаев зияткерлік мектебінің оқушысы:
- Алдағы уақытта біз осы қызметті тұрмыста көбірек қолдану бойынша ізденіс жасаймыз. Яғни үйдегі, мектептегі жиһаздарға және мүгедек жандарға арналған арбаларға жүйені енгіземіз.
ІТ-таланттар айналаны қауіпсіз әрі жайлы етуге мүдделі. 17 жастағы Шахмардан «ақылды хабарлағыштар» арқылы апатты жағдайлардың алдын алу жолын ұсынып отыр. Мәселен, құбыр тесіліп, табиғи газ пәтер ішіне таралса, арнайы сезгіш құрылғы дереу үй иесінің телефонына белгі береді.
Шахмардан Махмедқожа, Назарбаев зияткерлік мектебінің оқушысы:
- Газдың таралу көлемі шекті аумақтан асса, пәтер иесімен қатар авариялық қызметтерге, төтенше жағдай мекемесіне де хабарлама түседі. Бұл жүйені өндірістік нысандарда да қолдануға болады.
Қазақ тілінің латын графикасына көшу тұрғысындағы емлелік қиындықтарды шешуге Нұрбек Жүсіп өз жобасын ұсынып отыр. Болашақ инженер-эколог сөздерді, мәтіндерді, тіпті тұтас кітаптарды тез арада латынша таңбалау бағдарламасын ойлап тапқан.
Нұрбек Жүсіп, Қорқыт ата атындағы ҚМУ студенті:
- Қазіргі кезге дейін мыңдаған кітап, миллиондаған құжат eGov сайтындағы кез келген құжаттардың барлығы дерлік кирилл графикасында жазылған. Соны енді латын графикасына көшіру үшін көптеген уақыт қажет. Сол уақытты қысқарту әрі тиімді пайдалануды осы сайт арқылы аударуға мүмкіндік болады.
Индира Ақжігітова, облыс әкімі аппараты басшысының орынбасары:
- Іріктеліп алынған жобалар қаржылай қолдау табатындығы айқындалып тұр. Облыстық бюджет есебінен гранттар болады және «Атамекен» ұлттық палатасы тарапынан да қолдау табады. Одан бөлек кәсіпкерлер қатысып отыр, байқауымша өзіне қажетті жобаларды іріктеп, қолдайтындығын білдірді.
Сырбойылық өнертапқыштар ұсынған 13 ІТ еңбектің 8-і үздік деп танылды. Дегенмен инновациялық жобалар түгелдей дерлік қаржыландырылатын болып шешілді.
