Полиция департаментінде үздік қызметкерлер мен құрметті ардагерлер марапатталды

Kyzylorda-news.kz. Қызылорда облысы полиция департаментінде Қазақстан Республикасының Тәуелсіздік күніне арналған салтанатты іс-шара өтті. Оған Қызылорда облысы әкімінің міндетін атқарушы, Ұлттық қауіпсіздік комитетінің Қызылорда облысы және Байқоңыр қаласы бойынша департаментінің бастығы, ішкі істер органдарының ардагерлері қатысты.

Салтанатты іс – шараның ашылу салтанатында Қызылорда облысы полиция департаментінің бастығы полиция полковнигі Бектөре Сұлтан сөз алып, келген қонақтар мен қызметкерлерді Қазақстан Республикасы Тәуелсіздігінің 30 жылдығымен құттықтады. Сонымен бірге Департамент бастығы Ішкі істер министрі полиция генерал-лейтенанты Ерлан Тұрғымбаевтың құттықтау хатын оқыды.

«Ішкі істер органдарының барлық ардагерлерін, қызметкерлерін, сондай-ақ олардың отбасы мүшелерін Қазақстан Республикасы Тәуелсіздігінің 30 жылдығымен құттықтаймын.
Ардагерлерімізге мамандыққа адалдығы, жас мамандарды тәрбиелеуге, олардың бойында жоғары адамгершілік қасиеттерді, патриоттық және Отанға деген сүйіспеншілік сезімін қалыптастыруға қосқан үлесі үшін ерекше алғыс айтамын. Осы мереке күні баршаңызға зор денсаулық, отбасыларыңызға амандық және Отанымыз – Қазақстан Республикасының игілігі жолындағы қызметте табыс тілеймін» делінген құттықтау хатта.

Бүгінгі іс-шара барысында полицияның қызметтік міндеттерін адал атқарып, жұмыста жоғары көрсеткіштерге қол жеткізген қызметкерлер облыс әкімінің, Қазақстан Республикасы Ұлттық қауіпсіздік комитетінің, Ұлттық қауіпсіздік комитетінің Қызылорда облысы және Байқоңыр қаласы бойынша департаментінің, Ішкі істер министрінің және департамент бастығының құзырымен әр түрлі марапаттарға ие болды.

Атап айтқанда, Қызылорда облысы әкімінің міндетін атқарушы Нұрлан Тілешев мерекемен құттықтап, қоғамдық қауіпсіздікті қамтамасыз етудегі мінсіз қызметтері үшін облыс әкімінің «Алғыс хатымен» Ішкі істер органдарының 2 ардагерін және 11 қызметкерін марапаттады.

Ұлттық қауіпсіздікті қамтамасыз етуге қосқан үлестері үшін, сондай-ақ Қазақстан Республикасының Тәуелсіздігіне 30 жыл толуына байланысты Қазақстан Республикасы Ұлттық қауіпсіздік комитетінің «Грамотасымен» 1 қызметкер, «Алғыс хатпен» 3 қызметкер марапатталды.

Сондай-ақ Ұлттық қауіпсіздік комитетінің Қызылорда облысы және Байқоңыр қаласы бойынша департаментініңбастығы Рахимов Асылан мерекеге арналған құттықтау сөзін сөйлеп, 8 қызметкердімарапаттады.

Ішкі істер министрінің бұйрығымен «Қазақстан Республикасының Тәуелсіздігіне 30 жыл» медалімен ЖКБ бастығы полиция полковнигі Маштаев Әбілхан, Экстремизмге қарсы іс-қимыл басқармасы бастығының орынбасары полиция полковнигі Уразов Қуанышбек марапатталды.

«Ішкі істер органдарының құрметті қызметкері» төс белгісімен Ішкі істер министрлігінің Байқоңыр қаласындағы Өкілдігінің бастығы полиция полковнигі Ахметов Алтынбек марапатталды.

Ішкі істер органдарындағы ұзақ және адал қызметі, құқықтық тәртіп пен заңдылықты нығайтуға қосқан зор үлестері, жас қызметкерлерді Қазақстандық патриотизм рухында тәрбиелеуге белсенді қатысқандары үшін және Қазақстан Республикасы Тәуелсіздігіне 30 жыл толуына орай «Ішкі істер министрлігінің құрметті ардагері» төс белгісімен 4 ардагер, «Грамотамен» 5 ардагер марапатталды.

Қызылорда облысы Полиция департаменті бастығының бұйрығымен барлығы 307 қызметкер марапатталды.

Салтанатты шара полиция қызметкерлерімен дайындалған концертпен аяқталды. Полиция подполковнигі Нұржанов Артур, полиция майоры Қасымбек Ақмарал, Угай Борис, полиция лейтенанты Шарипова Аида, полиция аға лейтенанты Ахмет Дархан және Жаңабекұлы Нұразат патриоттық рухта әндер орындады.