Сыр Медиа

«Әркімнің туған жері Мысыр шаһары» дейді халық даналығы. Сол айтқандай, ақжармалық ғалым Еркін Қуанышбекұлы Ақтаев Елбасының «Болашаққа бағдар: рухани жаңғыру» атты бағдарламалық мақаласы аясында «Туған жерге тағзым» атты акциясы шеңберінде өзі он жыл білім алған №130 Абай атындағы орта мектепте болып, педагогикалық ұжыммен және мектеп оқушыларымен кездесті.

  Бір кездері ауылдағы өзен-көлдерді жағалап бұла өскен балдырғандар бұл күндері әр саланың тізгінін ұстаған атпал азаматтар. Солардың бірі Сырдария ауданы, Ақжарма ауылында туып өскен Еркін Ақтаев.

  Облыс орталығындағы Қорқыт ата атындағы ҚМУ-де 2012 жылға дейін түрлі басшылық қызметтерде болған Еркін Қуанышбекұлы Тараз қаласына қоныс аударып, сондағы жоғары оқу орындарында факультет деканы, ғылыми бөлімінің басшысы, проректор қызметтерін атқарады.

  Биылғы жылдың басынан бастап Қорқыт ата атындағы ҚМУ-дің «Педагогика» факультеті деканы қызметіне келген Еркін Ақтаев елге оралуын өзінің алтын ұя мектебіне тағзым етуден бастады.

 Мектеп кітапханасына 100-ге жуық кітаптарын тарту етті. Оның арасында өзінің Қазақстан Республикасы Білім және ғылым министрлігі ЖОО қауымдастығының тапсырысымен физикадан жазған оқулығы, ғылыми бағытта жазылған 2 монографиясы мен конференция жинақтарынан басқа балалар мен жасөспірімдерге арналған көркем әдебиеттер де бар.

  Мектеп оқушыларымен кездесу барысында Елбасының «Болашаққа бағдар: рухани жаңғыру» мақаласындағы «Туған жер» бағдарламасының маңыздылығы айтылды. Бағдарламадағы адами құндылықтар, рухани қазына, жас¬тарды тәрбиелеу, олардың бойына патриоттық рухты сіңіре білу қажеттілігі алға қойылып отырғандығы атап өтті.

  Оқушыларға рухани жаңғыру – тәуелсіз еліміздің бақытты болашағы мен келешегі үшін жасалып жатқан үлкен жұмыс екендігін жеткізе білген ғалым кездесу соңында мектеп бітіруші түлектерге алдағы тұрған маңызды сынақтардан сүрінбей өтуге тілек білдірді.

  Аталған кездесуге Еркін Ақтаевтың ұстазы, еңбек ардагері Патыма Құсейінова қатысып, шәкіртінің мектеп қабырғасынан физика-математика пәндеріне жетік болғанын, талантты азаматтың алдына қойған мақсатына жетіп, тәуелсіз еліміздің ғылымына елеулі үлес қосып келе жатқанын мақтанышпен әңгімеледі.

  Кездесуді мектеп директоры Бауыржан Әбутәліпұлы қорытындылап, алтын ұя мектебіне қамқорлық жасаған ғалымға алғысын білдірді.