ТУРИЗМ САЛАСЫНДАҒЫ ТЫҢ ЖОБА
Ұзаған жылдың мәресінде облыс орталығында Hackday фестивалі өткені мәлім. Озық ойлы қызылордалықтар – Еркін Ізмағанбет, Жеңісбек Сұлтанбекұлы, Арнұр Болатбек сол Hackday фестивалінде «Контент және медиа» бөлімі бойынша жүлделі II-орын иеленген еді.«Қаланың көрікті жерлерін 3d үлгіде ұсыну» бағдарламасының идея авторы және топ жетекшісі Роза Шермахановадан біз аталған жобаның ерекшелігі мен мақсаты туралы сұраған едік.
– Бұл жобаның идеясы қалай туындады?
– Мен жұмыс бабымен іссапарларға жиі шығамын. Бейтаныс қалаға барғанда дәріхана, сыйлық алуға болатын жақсы дүкен, қызықты мәдени нысандар қайда орналасқанын білмейміз. Оны іздеу үшін уақыт және қаражат кетеді. Осыдан кейін «Неге осы мақсатта мобильді қосымшаны қолданбасқа?» деген ой келді.
Біз бұл жобаның қонақ үйден бастау алғанын қаладық. Сонда бағдарламаны пайдаланушыда тіркелген қонақ үйінің іші қандай, бөлмелері қандай деген сұрақ туындамайды. Себебі, бағдарлама барлық ақпаратты 3d үлгіде көрсетеді.
Сондай-ақ, қаланың картасын, көрікті орындарын, туристке қажетті нысандарды (дәріхана, билет кассасы, елшілік ғимараты, театр, спорт алаңы т.б) қамтуды мақсат еттік.
– Жобаның артықшылығы неде?
– Біріншіден, жаңа технология көмегімен ақпарат 3d үлгісінде ұсынылады. Екіншіден, бұл – бизнес жоба. Яғни, мемлекетке де, демеушіге де тиімді бағдарлама. Сонымен қатар әкімшіліктің ұсынысымен жоба әлеуметтік маңызға ие болды. Мүмкіндігі шектеулі жандар кез келген нысанды үйде зерттеп алғаннан кейін ішінде жүріп-тұруы оңтайланады. Мәселен, емханада дәріхана немесе белгілі бір дәрігердің кабинеті қай қабатта орналасқанын алдын-ала білуге мүмкіндік алады.
– Жоба қашан жүзеге асады?
– Қазір бағдарламаға демеуші іздеудеміз. Қаржылай қолдау тапсақ, бағдарламаны іске қосуға дайынбыз.
Әсел БЕГМАН,
Қызылорда қаласы
