СУАРМАЛЫ ЖЕРЛЕРДІ ҚАЛПЫНА КЕЛТІРУ БАҒЫТЫНДА 3 ЖОБА БАР
Бұл туралы Өңірлік коммуникация қызметінде өткен брифингте облыстық табиғи ресурстар және табиғат пайдалануды реттеу басқармасының басшысы Нұрлыбек Жолдасбаев хабарлады.
БАҚ өкілдеріне басқарманың 9 айдағы жұмысы туралы баяндаған басқарма басшысы аймақта суармалы жерлерді қалпына келтіру бағытында 3 жоба қолға алынғанын атап өтті.
Жалпы көлемі 188 мың гектар болатын алқапты қалпына келтіруге арналған 3 жобаның жалпы құны 122 млрд.теңге болып отыр.
Бұл алқаптың 15 мың гектары «Ирригация және дренаж жүйлерін жетілдіру» (ИДЖЖ-2) жобасының 2-кезеңі аясындағы жұмыстар шеңберінде қалпына келтірілмек.
Ал 144 мың гектары «Ирригация және дренаж жүйлерін жетілдіру» (ИДЖЖ-3) жобасының 3-кезеңіне жатады. Тағы бір жоба бойынша жиырма тоғыз мың гектар суармалы жерлерді айналымға қосылмақ.
– ПУИД-2 жобасы мен 29 мың гектар суармалы жерді айналымға қосу жобасына енген су шаруашылығы нысандарын паспорттауға биыл облыстық бюджеттен 594 млн. теңге қаржы бөлінді. Жалпы осы жобалар іске асырылған жағдайда, суармалы жерлердегі 11 мың 802 шақырым су жүйелері мен 11 мың 165 шақырым қашыртқы-дренаж жүйелері және олардың бойындағы 64 мың дана гидротехникалық құрылыстар жөнделетін болады, – деді басқарма басшысы.
