«100 ЖАҢА ЕСІМ» ЖОБАСЫНА ІРІКТЕУ ҚАЛАЙ ЖҮРГІЗІЛЕДІ?
«100 жаңа есім» жобасына үмітті кандидаттардың өтінішін қабылдау басталды. Биыл іріктеу қалай жүргізіледі, тәртібі туралы «Казконтент» АҚ басқарма төрағасы Евгений Кочетов баяндады:
«Әдетте қарапайым адамдар өздері жайлы көпшілікке жария қылғысы келмейді. Кейбір жеңімпаздар тіпті олардың кандидатураларын жобаға ұсынғанынан хабарсыз болған еді. Мысалы, жас нейрохирург Марат Саршаев тек журналистермен тілдескеннен кейін ғана, көп дауыс жинағандар қатарында екенін білді. Сол мезетте жоба аяғына жақындап қалған еді. Тағы бір мысал: өрт лаулап жатқан үйден үш баланы құтқарған «100 жаңа есім» жеңімпаздарының бірі – Ғалымжан Әлеуханов. Оның туған туыстары ерлігі туралы теледидар арқылы білген екен. Міне, ортамызда сондай сыпайы батырлар бар. Сондықтан осы жылы өзге шешімге келдік: кандидаттардың өтініштерін ұжымдар ұсынады.
Үміткерлерді ұжымдар арқылы ұсыну барлық салалар бойынша түрлі ұйымдарды ынталандыруға мол мүмкіншілік береді. Сондықтан енді жобаның жаңа кандидаттарын іріктеу институционалдық тұрғыдан жүргізіледі.
Біз салалық қауымдастықтар, қоғамдық ұйымдар мен бірлестіктерді Қазақстанның «100 жаңа есімі» жобасының іріктеуіне жеке және кәсіби жетістіктері бар кандидаттарды ұсынуларын сұраймыз».
